Hacıqabul səfərində
Prezident İlham Əliyev aprelin 20-də Hacıqabula səfər edib. AZƏRTAC bildirir ki, mərhum prezident Heydər Əliyevin Hacıqabul şəhərindəki abidəsini ziyarət edən dövlət başçısı Hacıqabul Rayon İcra Hakimiyyətinin başçısı Rüstəm Xəlilovla bir araya gələrək bölgədə görülən işlər barədə məlumat alıb, ardınca Hacıqabul Sənaye Məhəlləsinin açılışına qatılıb.
İlham Əliyevin iştirakı ilə 11,5 kilometrlik Hacıqabul-Muğan avtomobil yolu yenidənqurmadan sonra istifadəyə verilib.
Prezident Meyniman kəndinin ərazisində fermer Elşən Xəlilovun 10 hektarlıq pambıq tarlası ilə tanış olub, əkin sahəsində pambıq səpininə start verilməsi prosesini izləyib, sonra rayonda “Aqro Dairy” Məhdud Məsuliyyətli Cəmiyyətin aqroparkının təqdimatında iştirak edib.
Hacıqabulda həmçinin 110/35/10 kilovoltluq “Qarasu” yarımstansiyası istismara verilib, “Azersun Şamaxı Aqropark” müəssisəsi açılıb.
Prezident rayonda Azərbaycan Televiziyasına müsahibə verib.
