Təyyarədə boş yerlər sərnişinləri infeksiyadan qoruya bilirmi?
Təyyarədə sənişin oturacaqları bir-birinə çox yaxın, bitişik olur. Koronavirus pandemiyası dövründə virusun yayılmasının qarşısını almağın əsas yollarından biri isə sosial məsafə saxlamaqdır. Aviasiya şirkətləri bütün yerlərə bilet satsa, aydın məsələdir ki, təyyarədə sərnişinlərin sosial məsafə saxlaması mümkün deyil. Bəs hər iki oturacaq arasında bir yerin boş saxlanması virusun ötürülmə səviyyəsini zəiflədə bilirmi?
Novator.az-ın məlumatına görə, ABŞ-ın Xəstəliklərin Profilaktikası və Nəzarət Mərkəzi bu suala aydınlıq gətirmək üçün laboratoriya şəraitində tədqiqat aparıb. Bəlli olub ki, iki sərnişin arasında bir oturacağın boş saxlanması bütün yerləri dolu olan təyyarə ilə müqayisədə infeksiyanın ötürülməsini doğrudan da zəiflədir. Təyyarənin modelindən asılı olaraq arada bir yerin boş saxlanması virusun yayılma dərəcəsini 23%-dən 57%-dək azalda bilir.
Ona görə də Xəstəliklərin Profilaktikası və Nəzarət Mərkəzi aviasiya şirkətlərinin bu qaydaya əməl etməsini, sərnişinlərin çiyin-çiyinə oturmasına imkan verilməməsini vacib sayır.
Mənbə: Jpost.com
