Diplomatik korpusda təyinatlar
Anar Abel oğlu Məhərrəmov İspaniya və Andorrada fövqəladə və səlahiyyətli səfir, eyni zamanda Ümumdünya Turizm Təşkilatı yanında daimi nümayəndə vəzifələrindən geri çağırılıb. Prezident İlham Əliyev sərəncamı aprelin 19-da imzalayıb.
Dövlət başçısının digər sərəncamları ilə Ramiz Ayvaz oğlu Həsənov xarici işlər nazirinin müavini vəzifəsindən azad edilərək İspaniya Krallığında fövqəladə və səlahiyyətli səfir postuna təyinat alıb.
Novator.az bildirir ki, Ramiz Həsənov 1961-ci il avqustun 20-də Gürcüstanın Marneuli şəhərində doğulub. 1982-ci ildə Moskva Dövlət Beynəlxalq Münasibətlər İnstitutunu bitirib.
1983-1990-cı illərdə SSRİ Xarici Ticarət Nazirliyində çalışıb.
1990-1992-ci illərdə Nazirlər Kabineti yanında Xarici İqtisadi Əlaqələr Komissiyasında, 1993-1997-ci illərdə Xarici İqtisadi Əlaqələr Nazirliyində işləyib.
1997-2004-cü illərdə “Azərkontrakt” Açıq Səhmdar Cəmiyyəti sədrinin birinci müavini olub.
2004-2005-ci illərdə Azərbaycanın Gürcüstandakı fövqəladə və səlahiyyətli səfiri postunu tutub.
2005-ci ildən Standartlaşdırma, Metrologiya və Patent üzrə Dövlət Agentliyinin baş direktoru, 2008-ci ildən Standartlaşdırma, Metrologiya və Patent üzrə Dövlət Komitəsinin sədri vəzifəsində çalışıb.
2018-ci ilin may ayından xarici işlər nazirinin müavini idi.
Dövlət başçısı həmçinin Zaur Rəşid oğlu Əhmədovu İsveçdə fövqəladə və səlahiyyətli səfir, Hüseyn Cəlal oğlu Hüseynovu Bolqarıstanda fövqəladə və səlahiyyətli səfir, Eldar Nadir oğlu Səlimovu İordaniyada fövqəladə və səlahiyyətli səfir təyin edib.
