Avtomobil istehsalı???
2021-ci ilin yanvar-mart aylarında Azərbaycanda 408 ədəd minik avtomobili istehsal olunub, aprelin 1-nə 267 ədəd hazır məhsul ehtiyatı yaranıb. Dövlət Statistika Komitəsi belə hesabat yayıb.
Novator.az-ın məlumatına görə, iqtisadçı Natiq Cəfərli rəsmi statistikaya münasibət bildirərək yazır: “Ölkədə avtomobil istehsalı yoxdur – vintaçanla yığma var. O zaman istehsal deyərsən ki, avtomobil detallarının heç olmasa 25%-i ölkədə buraxılsın. Bizdə isə yığılan avtomobillərin ancaq təkərlərinə vurulan hava yerlidir, başqa hər şey xaricdən, valyuta ilə alınıb gətirilir. Detallar valyuta ilə alınır, sonra həmin maşınlar büdcə təşkilatlarına satılır, büdcədən ayrılan manat valyutaya çevrilib ölkədən çıxır.
2021-ci ilin ilk üç ayında 408 avtomobil yığılıb, onun cəmi 141 ədədi satılıb. Aya 47 avtomobil yığıb büdcə vəsaitinə satıblar, qalanı anbarda qalıb, buna fəxrlə “yerli avtomobil istehsalı” deyirlər.
Avtomobil istehsalı başqadır, məsələn, “Toyota” dəqiqəyə 19,9 ədəd, “Volkswagen” 19,8 ədəd, “Hyundai” 13,7 ədəd avtomobil istehsal edir. Yəni “Toyota”nın az qala 20 dəqiqəyə istehsal etdiyi qədər maşını bizimkilər 3 aya vintaçanla yığıblar”.
