Xarici ticarətin ilk rübü
2021-ci ilin ilk rübü üzrə xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, yanvar-mart aylarında Azərbaycanın xarici ticarət əməliyyatlarının həcmi 6,6 milyard dolları ötüb, 4,1 milyard dollardan çox ixrac, 2,5 milyard dollardan çox idxal qeydə alınıb.
153 ölkə ilə ticarət əməliyyatı aparıldığı, gömrük orqanlarının büdcəyə 943,5 milyon manat vəsait ödədiyi vurğulanır.
Rəsmi məlumata əsasən, ixracın 8,7 faizi Müstəqil Dövlətlər Birliyi (MDB) ölkələrinin, 47,4 faizi Avropa İttifaqı ölkələrinin, 43,9 faizi başqa ölkələrin payına düşüb.
İdxalda MDB-nin payı 24,1 faiz, Avropa İttifaqının payı 19,1 faiz, başqa ölkələrin payı 56,8 faiz göstərilir.
Yanvar-mart aylarında əsas tərəfdaş İtaliya olub, bu ölkə ilə ticarət ümumi dövriyyənin 23,2 faizi həcmində rəsmiləşib.
İxracda əsas ölkə İtaliya (ümumi ixracın 35,5 faizi), idxalda Rusiyadır (17,7 faiz).
Hesabata görə, ixracın 87,8 faizindən çoxu neft-qaz sektoruna daxil olan mallardır.
İdxalda ən böyük pay maşın, mexanizm, elektrik avadanlıqları və onların hissələrinin payına düşür: 26,7 faiz.
Üç ayda gömrük orqanları 82 cinayət xarakterli fakt, 5564 inzibati xəta qeydə alıb.
