Viza sərəncamı
2020-ci ildə koronavirus pandemiyasına görə təxirə salınmış 16-cı Avropa futbol çempionatının final mərhələsi 2021-ci ilin iyun-iyul aylarında Amsterdam, Bakı, Bilbao, Budapeşt, Buxarest, Dublin, Kopenhagen, Qlazqo, London, Münhen, Roma və Sankt-Peterburq şəhərlərində keçiriləcək. Novator.az bildirir ki, Azərbaycan paytaxtına, Bakı Olimpiya Stadionuna A qrupunun üç oyunu (Uels – İsveçrə (12 iyun), Türkiyə – Uels (16 iyun), İsveçrə – Türkiyə (20 iyun) və 1/4 finalın bir oyunu (3 iyul) salınıb.
Aprelin 13-də prezident İlham Əliyev həmin oyunlar üçün Azərbaycana gələn əcnəbilər və vətəndaşlığı olmayan şəxslərin mayın 1-dən iyulun 5-dək ölkənin dövlət sərhədindəki buraxılış məntəqələrində viza almasını mümkün edən sərəncam imzalayıb. Viza üçün bu sənədlərdən biri təqdim olunmalıdır:
– oyunların Bakı şəhərində keçirilməsi üzrə təşkilat komitəsinin və ya Azərbaycan Futbol Federasiyaları Assosiasiyasının (AFFA) rəsmi dəvət məktubu;
– Avropa Futbol Assosiasiyaları Birliyinin (UEFA) müvafiq qaydalarına uyğun olaraq akkreditasiyadan keçməni təsdiq edən akkreditasiya kartı və ya digər sənəd;
– Bakı şəhərində keçiriləcək oyunlarda iştirak edən futbol komandalarının təmsil etdikləri ölkələrin vətəndaşları və həmin ölkələrdə daimi yaşayan vətəndaşlığı olmayan şəxslər üçün oyuna bilet və ya biletin əldə olunmasını təsdiq edən sənəd.
Oyunların təşkili və keçirilməsi ilə bağlı Azərbaycan Respublikasının ərazisində əmək fəaliyyətinə cəlb edilən və müvafiq qaydada akkreditasiyadan keçmiş əcnəbilər və vətəndaşlığı olmayan şəxslər üçün iş icazəsinin alınması tələb olunmur.
