70-in “Şöhrət”i
Cəlilabad-Masallı-Biləsuvar seçki dairəsinin deputatı, Milli Məclis sədrinin müavini Fəzail İbrahimli “Şöhrət” ordeni ilə təltif edilib. Prezident İlham Əliyevin 12 aprel sərəncamında təltif Fəzail İbrahimlinin Azərbaycanın ictimai-siyasi həyatında fəal iştirakı ilə əsaslandırılıb.
Novator.az bildirir ki, aprelin 12-də Fəzail İbrahimlinin 70 yaşı tamam olur.
1951-ci ildə doğulan Fəzail İbrahimli tarix elmləri doktorudur. Yardımlı rayonunda orta məktəb müəllimi işləyib, Azərbaycan Dövlət Universitetində müəllim, baş müəllim, dosent vəzifələrində çalışıb. Bakı Dövlət Universitetinin professorudur.
Vətəndaş Həmrəyliyi Partiyasının üzvüdür.
2000, 2005, 2010, 2015 və 2020-ci illərdə Milli Məclisin deputatı seçilib.
Milli Məclis sədrinin müavini postunu 2020-ci il martın 10-dan tutur.
