Müavinət məbləğləri
Novator.az Azərbaycanın bəzi müavinətlərinin siyahısına nəzər salıb.
İşləyən qadınlara hamiləlik dövründə və doğumdan sonrakı dövr üçün 126 təqvim günü (doğumdan əvvəl 70 təqvim günü, doğumdan sonra 56 təqvim günü) müddətində ödənişli məzuniyyət verilir.
Doğum çətin olduqda, iki və ya daha çox uşaq doğulduqda doğumdan sonrakı məzuniyyət 70 təqvim gününə yüksəlir.
Kənd təsərrüfatı istehsalatı sahələrində bilavasitə çalışan qadınların hamiləliyə və doğuma görə məzuniyyət müddətləri belədir:
normal doğumda 140 təqvim günü;
doğum çətin olduqda 156 təqvim günü;
iki və ya daha çox uşaq doğulduqda 180 təqvim günü.
Müavinət almaq hüququ ən azı 6 ay sosial sığorta stajı olan şəxslərə şamil edilir. Hər iki halda müavinətin aylıq maksimal həddi əmək pensiyasının minimum məbləğinin (200 manat) 25 mislindən artıq ola bilməz.
Uşağın anadan olmasına görə birdəfəlik müavinət 200 manatdır.
Ünvanlı dövlət sosial yardımı təyin olunan ailəyə əlavə dəstək olaraq 1 yaşadək uşağı olduğu halda uşağın 1 yaşı tamam olan ayın sonunadək aylıq müavinət təyin edilir. 55 manat məbləğindədir.
Uşağa bilavasitə qulluq edən, işləyən valideynlərdən birinin, yaxud ailənin başqa üzvünün uşağın 3 yaşı tamam olanadək ona qulluq etmək üçün iş yerindən qismən ödənişli sosial məzuniyyət almaq hüququ var. Aylıq müavinətin məbləği 1 yaş yarımadək uşağa qulluğa görə 44 manat, 1 yaş yarımdan 3 yaşınadək uşağa qulluğa görə 28 manatdır.
Beşdən çox uşaq doğub tərbiyə edən qadınlara (uşaqların sağ olması şərti ilə) altıncı uşağı 1 yaşına çatdıqda müavinət təyin edilir. 55 manat məbləğində müəyyənləşdirilib.
Əmək pensiyası yaşına çatmış şəxslər yaşa görə pensiya hüquqları olmadıqda müavinət alır. 130 manatdır. Hazırda kişilər 65, qadınlar 62 yaşda pensiyaya çıxır.
Beş və daha çox uşaq doğub onları 8 yaşınadək tərbiyə etmiş qadınların yaşa görə müavinət hüququ qazanmaq üçün yaş həddi hər uşağa görə 1 il azaldılır.
Eləcə də ana vəfat etdiyinə və ya ana ilə nikaha xitam verildiyinə, yaxud ana valideynlik hüququndan məhrum edildiyinə görə 5 və daha çox uşağı növbəti nikah bağlamadan, təkbaşına 8 yaşınadək böyüdən ataların, habelə 5 və daha çox uşağı övladlığa götürüb təkbaşına 8 yaşınadək böyüdən ataların, həmçinin 5 və daha çox uşağı 8 yaşınadək böyüdən qəyyum kişilərin yaş həddi 5 il azaldılmaqla yaşa görə müavinət hüququ var.
Əlillik ümumi xəstəlik, hərbi xidmət dövründə xəstələnmə, əmək zədəsi və peşə xəstəliyi, hərbi əməliyyatlar keçirilən zonada olmaqla əlaqədar, Çernobıl AES-də qəzanın ləğvi ilə əlaqədar, Azərbaycanın ərazi bütövlüyünün, müstəqilliyinin və konstitusiya quruluşunun müdafiəsi ilə əlaqədar və 1990-cı ilin 20 Yanvar hadisələri ilə əlaqədar, Çernobıl AES-də hərbi xidmətlə əlaqədar və ya hərbi xidmət vəzifələrini yerinə yetirməklə əlaqədar səbəbindən baş verdikdə I qrup əlillərə 150 manat, II qrup əlillərə 130 manat, III qrup əlillərə 110 manat müavinət verilir.
Sağlamlıq imkanları məhdud 18 yaşınadək uşaqlara sosial müavinət 150 manatdır.
Övladlığa götürülən uşağa görə 160 manat, övladlığa götürülən sağlamlıq imkanları məhdud 18 yaşınadək uşağa görə 480 manat müavinət düşür.
Ailə başçısını itirməyə görə müavinət bu şəxslərə təyin edilir:
vəfat etmiş şəxsin uşaqlarına – 18 yaşına çatanadək (əyani təhsil alanlara təhsili bitirənədək, lakin 23 yaşdan çox olmamaqla);
vəfat etmiş şəxsin 18 yaşına çatanadək sağlamlıq imkanlarının məhdudluğu müəyyən olunmuş 18 yaşından yuxarı əlil uşaqlarına – əlillik müddətinə;
vəfat etmiş şəxsin 8 yaşınadək uşaqlarına baxan və işləməyən (yaşından və əmək qabiliyyətindən asılı olmayaraq) valideynlərdən, qardaş, bacı, baba və nənələrdən birinə – uşağın 8 yaşınadək.
80 manatdır.
Şəhidin 16 yaşına (ümumtəhsil məktəblərində təhsil alanlar 18 yaşına) çatmamış uşaqlarına aylıq müavinət 21 manat məbləğində müəyyənləşdirilib.
Müddətli həqiqi hərbi xidmət hərbi qulluqçularının 16 yaşına (ümumtəhsil məktəblərində təhsil alanlar 18 yaşına) çatmamış uşaqlarına aylıq müavinət 100 manatdır.
Müharibə əlillərinin, 20 Yanvar hadisələri zamanı əlil olanların 16 yaşına (ümumtəhsil məktəblərində təhsil alanlar 18 yaşınadək) çatmamış uşaqlarına aylıq müavinət 15 manat məbləğindədir.
Müharibə ilə və ya 1990-cı ilin 20 yanvar hadisələri ilə əlaqədar əlilliyi olan şəxslərin, Çernobıl qəzası nəticəsində I və II dərəcə əlilliyi müəyyən edilmiş, yaxud vəfat etmiş valideynlərin uşaqlarına, habelə Çernobıl qəzası nəticələrinin aradan qaldırılması iştirakçılarının dispanser qeydiyyatında olan uşaqlarına müavinət 15 manatdır.
Ünvanlı dövlət sosial yardımı almaq hüququ olduqda və barəsində qəyyumluq (himayəçilik) təyin edilmiş uşaqlar tam dövlət təminatında olmadıqda qəyyumluq (himayəçilik) müəyyən edildiyi müddətə müavinət təyin olunur. 100 manatdır.
Radiasiya qəzası nəticəsində zərərçəkmiş şəxslərə hər il müalicə üçün birdəfəlik müavinət 237 manat məbləğində müəyyənləşdirilib.
Dəfn üçün müavinət işsizlikdən sığorta ödənişi alan və ya bu müavinətlərdən biri təyin edilmiş şəxs vəfat etdikdə ödənir:
dövlət qulluqçularına ömürlük müavinət;
yaşa görə müavinət;
əlilliyə görə müavinət;
sağlamlıq imkanları məhdud 18 yaşınadək uşaqlara müavinət;
ailə başçısını itirməyə görə müavinət.
300 manat məbləğində müəyyənləşdirilib.
Əmək pensiyaçısı vəfat etdikdə əmək pensiyasının minimum məbləğinin (200 manat) 3 misli məbləğində dəfn üçün müavinət verilir: 600 manat.
Cəza çəkməkdən azad edilmiş və sosial adaptasiyaya ehtiyacı olan şəxslərə birdəfəlik müavinətin məbləği ölkə üzrə müəyyən edilmiş minimum əməkhaqqının (250 manat) 4 misli miqdarındadır: 1000 manat.
