İnfeksiyalı yoxsulluq
Sosial araşdırmalarla məşğul olan “Pew Research Center” qurumu (ABŞ) Dünya Bankının məlumatlarına əsaslanaraq koronavirus pandemiyasının əhalinin gəlirlərinə təsirini qiymətləndirib. Hesabata görə, pandemiya nəticəsində dünyada orta sinfin çəkisi azalıb, yoxsulluq artıb, 2020-ci ildə orta sinfə aid şəxslərin sayı proqnozlaşdırılandan 54 milyon nəfər az, yoxsulların sayı isə 131 milyon nəfər çox olub.
Araşdırma üzə çıxarıb ki, pandemiyaya qədər dünyada yoxsul əhalinin payı 8,7% olduğu halda hazırda 10,4%-ə yüksəlib. Bu müddətdə orta gəlirli əhalinin payı 17,8%-dən 17,1%-ə, yüksək gəlirli əhalinin payı 7,6%-dən 6,8%-ə düşüb.
Novator.az-ın məlumatına görə, iqtisadçı Samir Əliyev yazır ki, “Pew Research Center” əhalinin gəlir qrupu üzrə zərəri belə təsnif edir:
– yoxsullar (gündəlik qazancı 2 dollara qədər olan şəxslər) 131 milyon nəfər artıb;
– aşağı gəlirli (gündəlik qazancı 2-10 dollar arası olan) şəxslər 21 milyon nəfər azalıb;
– orta sinfə aid (gündəlik qazancı 10-20 dollar arası olan) şəxslər 54 milyon nəfər azalıb;
– gəliri orta səviyyədən yuxarı olan (gündəlik 20-50 arası qazanan) şəxslər 36 milyon nəfər azalıb;
– yüksək gəlirli (gündəlik qazancı 50 dollardan çox olan) şəxslər 62 milyon nəfər azalıb.
Ekspert qeyd edir ki, Dünya Bankının hesablamasına görə, Azərbaycanda orta sinfin payı 2015-ci ilin devalvasiyasından əvvəl 30%-ə yaxın olub: “Həm devalvasiyanı, həm də pandemiyanı nəzərə alsaq, hazırda bu göstəricinin əhəmiyyətli dərəcədə aşağı düşdüyünü güman etmək mümkündür”.
2019-cu ilin dekabrında Çində üzə çıxaraq dünyanı bürüyən koronavirus infeksiyası 206 ölkə, ərazi və məkanda 2,8 milyondan çox adamın ölümünə gətirib. Pandemiyanı cilovlamaq üçün ölkələrin böyük qismi iqtisadi qapanmalara gedib, bu da sosial durumu pisləşdirib.
