Texnologiyaların Kommersiyalaşdırılması və Transferi Mərkəzi yaradılır
Prezident İlham Əliyev Əqli Mülkiyyət Agentliyinin tabeliyində Texnologiyaların Kommersiyalaşdırılması və Transferi Mərkəzinin yaradılmasına fərman verib. Aprelin 6-da imzalanan sənədlə Nazirlər Kabinetinə Texnologiyaların Kommersiyalaşdırılması və Transferi Mərkəzini 15 gün müddətində yaratmaq tapşırılıb.
Fərmana görə, Texnologiyaların Kommersiyalaşdırılması və Transferi Mərkəzi elm və sənaye arasında bağlantı, qarşılıqlı sifariş və təklif münasibətlərinin yaradılmasını, ixtiraçılıq fəaliyyətinin keyfiyyətcə artması və tətbiqi xarakter daşıması üçün texnologiyaların transferini və əqli fəaliyyət nəticələrinin kommersiyalaşdırılmasını həyata keçirən, innovativ inkişafın, o cümlədən startap layihələrin dəstəklənməsinə xidmət edən, elmi tədqiqatların nəticələrinin kommersiya və qeyri-kommersiya məqsədilə istifadəsi üçün transferinə, həmçinin bu nəticələrdən gəlir əldə etməyə yönəldilən, müştərilərə texnologiyaların və layihələrin hədəf bazarlarına çıxarılması xidmətlərinin göstərilməsində, bu sahədə fəaliyyətin əlaqələndirilməsində iştirak edən publik hüquqi şəxsdir.
