Nazirlər Kabinetinin rəsmi məlumatı
Nazirlər Kabineti rəsmi məlumat yayıb. Qeyd olunur ki, Vergi Məcəlləsində yeniliklər əlavə dəyər vergisindən (ƏDV) azadolmaların müddətinin uzadılmasını, aksiz vergisindən azadolmanı, aksizli malların siyahısına və vergi dərəcələrinə dəyişiklikləri nəzərdə tutub: “Qızıldan və gümüşdən hazırlanan zərgərlik məmulatlarının istehsalı və emalı işlərinin görülməsi məqsədilə dəzgahların, avadanlıqların və qurğuların idxalı 1 yanvar 2021-ci ildən 3 il müddətinə ƏDV-dən azad edilib.
İdxal olunan platin, qızıl və onlardan hazırlanmış zərgərlik və digər məmulatlar, emal olunmuş, çeşidlənmiş, çərçivəyə salınmış və bərkidilmiş almaz 1 yanvar 2021-ci ildən 3 il müddətinə aksiz vergisindən azaddır.
Aksizli malların siyahısı genişləndirilib, istehsal məqsədli istisna olmaqla müxtəlif tütün məhsulların aksiz vergisinin dərəcələri artırılıb.
Nazirlər Kabinetinin 5 aprel qərarları ilə tütün məmulatlarına tətbiq edilən aksiz vergisinin dərəcələrinin artırılması məqsədəuyğun hesab edilib”.
Əsas yeniliklərdən biri 1000 ədəd siqaret üçün aksiz vergisinin 39 manatdan 43 manata qaldırılmasıdır. Qərarlar dərc olunduqdan bir ay sonra qüvvəyə minir.
