Müsavat fəalına cəza kəsilib
Suraxanı Rayon Məhkəməsi aprelin 5-də Müsavat Partiyasının üzvü Nizaməli Süleymanova 20 sutka həbs cəzası kəsib. İnzibati Xətalar Məcəlləsinin 206 maddəsi ilə – psixotrop maddədən istifadədə ittiham olunan müsavatçı ilə birlikdə qardaşı oğlu Akif Süleymanov da 20 sutka həbs cəzası alıb.
Nizaməli Süleymanov “Basta” saytına açıqlamasında qərarın onun siyasi fəaliyyəti ilə bağlı olduğunu deyib: “Müxtəlif üsullarla məni təhdid edib Müsavatdan çıxmağımı istəyirlər. Çıxmadığım üçün cəzalandırırlar”.
Müsavatçı son dövrlərdə ən müxtəlif təzyiqlərlə üzləşdiyini, o cümlədən yaşadığı evə təbii qazın verilməsinin dayandırıldığını vurğulayıb.
Nizaməli Süleymanovun aprelin 5-i səhər Suraxanı Rayon Polis İdarəsinin 30-cu bölməsinə çağırıldığı, ondan partiyadan istefa verməsi və müxalifətçiliyə son qoymasının tələb olunduğu bildirilir.
