Aprelin 5-də yayılan rəsmi məlumata görə, kənd təsərrüfatı naziri İnam Kərimov Şəkinin Bideyiz kəndində 320 hektarlıq fındıq bağının salınması işləri ilə tanış olub, həmçinin Biləcik kəndində, keçmiş çay yatağında salınmış fındıq bağına, Qaxın Qaşqaçay kəndində daşdan təmizlənmiş sahədə salınmış intensiv fındıq bağlarına baxış keçirib. Məlumatı şərh edən iqtisadçı Qubad İbadoğlu subsidiya məsələsinə diqqət çəkir. 2021-ci ildə salınan fındıq bağlarına birdəfəlik əkin subsidiyası verilir. Subsidiya veriləcək fındıq bağları 200-1500 metr hündürlükdə olan dağlıq və ya dağətəyi yerlərdə salınmalı, hər hektarda ən azı 330 ting əkilməli, bağ damla suvarma sistemi ilə təchiz olunmalıdır.
Novator.az-ın məlumatına görə, Qubad İbadoğlu qeyd edir ki, Azərbaycanda subsidiyalarla bağlı qərarlar – subsidiyanın növləri, hansı məhsullara subsidiya verilməsi, hər hektara üzrə subsidiya əmsalları, birdəfəlik subsidiyaların məbləği, ayrı-ayrı subsidiya növlərinin əhatə etdiyi rayonların siyahısı kimi məsələlər kənd təsərrüfatı nazirinin sədrlik etdiyi Aqrar Subsidiya Şurasının səlahiyyətindədir: “Meyvə bağlarına hektara görə subsidiya verilirdi, 2021-ci ildən isə 6 növ meyvə bitkisi bağlarının salınmasına birdəfəlik əkin subsidiyası da düşür. Kənd təsərrüfatı nazirinin iştirakı ilə 320 hektar ərazidə salınan fındıq bağına dövlət büdcəsi hesabına veriləcək subsidiyanın məbləği bağın salındığı ildən ilk 4 il ərzində 233 min 600 manat, 4 ildən sonrakı illər üzrə 80 min manatdır. İntensiv fındıq bağlarının salınması üçün 1 milyon 408 min manat birdəfəlik ödəmə düşür. Daşlıqda fındıq bağı salmaqda bu kəramət var”.
