Əhməd Əhmədzadə postdan getdi
Əhməd Əhmədzadə “Azərbaycan Meliorasiya və Su Təsərrüfatı” Açıq Səhmdar Cəmiyyətinin sədri vəzifəsindən azad edilib. Prezident İlham Əliyev aprelin 2-də belə sərəncam imzalayıb.
Novator.az bildirir ki, 1945-ci il təvəllüdlü Əhməd Əhmədzadə Qax Rayon Xalq Deputatları Soveti İcraiyyə Komitəsinin sədri, Abşeron Rayon Xalq Deputatları Soveti İcraiyyə Komitəsinin sədri, Füzuli Rayon Partiya Komitəsinin birinci katibi, Şamxor (Şəmkir) Rayon Partiya Komitəsinin birinci katibi, Şəki Şəhər Partiya Komitəsinin birinci katibi, Şəki Rayon Xalq Deputatları Sovetinin sədri, Quba Rayon İcra Hakimiyyətinin başçısı vəzifələrində işləyib.
1981-1995-cı illərdə Azərbaycan Ali Sovetinin deputatı seçilib.
Nazirlər Kabineti yanında Meliorasiya və Su Təsərrüfatı Komitəsinin sədri, kənd təsərrüfatı nazirinin birinci müavini, Kənd Təsərrüfatı Nazirliyi yanında Dövlət Meliorasiya və Su Təsərrüfatı Agentliyinin baş direktoru olub.
“Azərbaycan Meliorasiya və Su Təsərrüfatı” Açıq Səhmdar Cəmiyyətinin sədri vəzifəsini 2006-cı ildən tuturdu.
