“Şərəf” ordeni
Prezident İlham Əliyev Mərkəzi Seçki Komissiyasının (MSK) sədri Məzahir Pənahovu “Şərəf” ordeni ilə təltif edib. Martın 30-da imzalanan sərəncam Məzahir Pənahovun ictimai-siyasi həyatda uzunmüddətli səmərəli fəaliyyəti ilə əsaslandırılıb.
2021-ci ildə Məzahir Pənahovun 70 yaşı tamam olur.
Novator.az bildirir ki, 1951-ci il təvəllüdlü Məzahir Pənahov fizika-riyaziyyat elmləri doktoru, professordur. MSK-ya 2000-ci ildən sədrlik edir.
Onun sədrliyi ilə 13 seçki, 3 referendum keçirilib.
2000-ci il noyabrın 5-də, 2005-ci il noyabrın 6-da, 2010-cu il noyabrın 7-də, 2015-ci il noyabrın 1-də və 2020-ci il fevralın 9-da parlament seçkiləri olub.
Onun dövründəki prezident seçkiləri 2003-cü il oktyabrın 15-nə, 2008-ci il oktyabrın 15-nə, 2013-cü il oktyabrın 9-na və 2018-ci il aprelin 11-nə düşüb.
Məzahir Pənahovla bələdiyyə seçkiləri bu tarixlərdə olub: 17 dekabr 2004-cü il, 23 dekabr 2009-cu il, 23 dekabr 2014-cü il, 23 dekabr 2019-cu il.
2002-ci ilin 24 avqust, 2009-cu ilin 18 mart və 2016-cı ilin 26 sentyabr referendumları da Məzahir Pənahovun MSK-ya rəhbərliyi ilə baş tutub.
Məzahir Pənahov “Şöhrət” ordeni laureatıdır.
Qanunvericiliyə görə, 18 nəfərlik MSK-da yerlərin üçdə bir hissəsini parlamentdəki çoxluq partiyasının, üçdə bir hissəsini azlıqda qalan partiyaların, üçdə bir hissəsini bitərəflərin təqdim etdiyi nümayəndələr tutur. Üzvləri parlament təyin edir.
