1 dollara neçə maska?
Azərbaycan Demokratiya və Rifah Hərəkatının sədri, iqtisadçı Qubad İbadoğlu yerli istehsal olan tibbi maskanın bahalığına diqqət çəkib. Novator.az-ın məlumatına görə, o yazır ki, 1 ABŞ dollarına Qazaxıstanda 42 ədəd, Rusiyada 35 ədəd, Ukraynada 18 ədəd yerli istehsal olan tibbi maska almaq mümkündür, Azərbaycanda isə həmin pula cəmi 7 ədəd maska düşür: “Bu da yerli istehsal. Kimin üçündür belə istehsal, qazanan kimdir? Hakimiyyət və sahibkarlar sanki koronavirusla müttəfiqlik edir, əhalinin cibinə girirlər”.
Azərbaycanda koronavirus pandemiyası üzündən xüsusi karantin rejimi hökm sürür. Bütün qapalı və açıq məkanlarda tibbi maskalardan istifadə məcburidir.
İnzibati Xətalar Məcəlləsinə əsasən, epidemiya əleyhinə, sanitariya-gigiyena və karantin rejimləri dövründə tənəffüs yollarını qoruyan fərdi vasitələrdən istifadə tələblərinin pozulmasına, habelə həmin tələblərin pozulmasının qarşısını almamağa görə fiziki şəxslərə 100 manat məbləğində, vəzifəli şəxslərə 300 manat məbləğində, hüquqi şəxslərə 600 manat məbləğində cərimə tətbiq edilir.
Xətanı inzibati tənbeh almış şəxsin il ərzində təkrar törətməsi halında fiziki şəxslərə 200 manat məbləğində, vəzifəli şəxslərə 600 manat məbləğində, hüquqi şəxslərə 1200 manat məbləğində cərimə düşür.
1 ABŞ dolları 1,7 manata bərabərdir. Tibbi maskanın qiyməti 20-30 qəpik arasında dəyişir.
