Peyvənd olunmuş ana əmizdirdiyi körpədə immunitet yarada bilərmi?
İsrail alimləri koronavirusa qarşı peyvənd olunmuş anaların südündə antitellər aşkarlayıblar.
Novator.az saytı “Yerusəlim Post” qəzetinə istinadla xəbər verir ki, Tel-Əviv Universitetinin və Suraski-İxilov adına Tibb Mərkəzinin mütəxəssisləri koronavirusa qarşı peyvənd olunmuş uşaq əmizdirən analar üzərində araşdırma aparıblar.
Araşdırma peyvənd olunandan sonra ana südündə koronavirusa qarşı antitellərin yarandığını üzə çıxarıb.
Körpələrin ana südü vasitəsilə müxtəlif növ immunitetlər qazandığı çoxdan bəllidir. Ancaq COVİD-19 infeksiyasına qarşı immunitetin uşağa ana südüylə keçib-keçmədiyi barədə kifayət qədər elmi dəlil yoxdur.
İsrail alimləri ana südündəki antitellərin koronavirusu zərərsizləşdirmək qabiliyyətində olub-olmadığını da araşdırıblar və nikbin nəticələr əldə ediblər.
Bu tədqiqatın nəticələri hazırda mütəxəssis rəyindən keçmə mərhələsindədir. İsrail alimlərinin əldə etdiyi nəticələrin ABŞ-ın Oreqon ştatındakı Providens Xərçəng İnstitutunda aparılan tədqiqatın nəticələri ilə üst-üstə düşdüyü bildirilir.
Koronavirusa qarşı peyvəndin birinci və ikinci dozasını qəbul etmiş anaların südündə antitellərin səviyyəsinin gücləndiyini deyən alimlər bununla ana südünün körpələri koronavirusdan qoruyacağına, ana südü sayəsində uşaqlarda COVİD-19 əleyhinə immuniet formalaşacağına ümid bəsləyirlər.
Mənbə: Jpost.com
