Kabinet hesabat verib
Milli Məclisin 16 mart iclasında Nazirlər Kabinetinin 2020-ci ildəki fəaliyyəti haqqında hesabat verilib. Məruzə ilə baş nazir Əli Əsədov çıxış edib.
Konstitusiyada Nazirlər Kabinetinin statusu prezidentin yuxarı icra orqanı kimi müəyyən olunub. Ana qanuna görə, ölkə prezidenti icra səlahiyyətlərinin həyata keçirilməsinin təşkili məqsədi ilə Nazirlər Kabineti yaradır. Nazirlər Kabinetinin tərkibinə baş nazir, onun müavinləri, nazir və başqa mərkəzi icra hakimiyyəti orqanlarının rəhbərləri daxildir.
Hazırda 17 nazirlik (Xarici İşlər Nazirliyi; Müdafiə Nazirliyi; Müdafiə Sənayesi Nazirliyi; Ədliyyə Nazirliyi; Daxili İşlər Nazirliyi; Fövqəladə Hallar Nazirliyi; Maliyyə Nazirliyi; İqtisadiyyat Nazirliyi; Kənd Təsərrüfatı Nazirliyi; Energetika Nazirliyi; Nəqliyyat, Rabitə və Yüksək Texnologiyalar Nazirliyi; Əmək və Əhalinin Sosial Müdafiəsi Nazirliyi; Təhsil Nazirliyi; Səhiyyə Nazirliyi; Mədəniyyət Nazirliyi; Ekologiya və Təbii Sərvətlər Nazirliyi; Gənclər və İdman Nazirliyi), 7 komitə (Dövlət Gömrük Komitəsi; Dövlət Statistika Komitəsi; Dövlət Şəhərsalma və Arxitektura Komitəsi; Qaçqınların və Məcburi Köçkünlərin İşləri üzrə Dövlət Komitəsi; Diasporla İş üzrə Dövlət Komitəsi; Dini Qurumlarla İş üzrə Dövlət Komitəsi; Ailə, Qadın və Uşaq Problemləri üzrə Dövlət Komitəsi), 5 xidmət (Dövlət Təhlükəsizliyi Xidməti; Xarici Kəşfiyyat Xidməti; Dövlət Sərhəd Xidməti; Dövlət Miqrasiya Xidməti; Səfərbərlik və Hərbi Xidmətə Çağırış üzrə Dövlət Xidməti) var.
Dövlət Turizm Agentliyi; Qida Təhlükəsizliyi Agentliyi və Milli Arxiv İdarəsi də mərkəzi icra hakimiyyəti orqanlarıdır.
Nazirlər Kabineti hər il Milli Məclisin yaz sessiyasının beşinci iclasında fəaliyyəti haqqında hesabat verməlidir.
