İxracın 88 faizindən çoxu neft-qazdır
2021-ci ilin ilk iki ayı üzrə xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, yanvar-fevral aylarında Azərbaycanın xarici ticarət əməliyyatlarının həcmi 4,3 milyard dolları ötüb, 2,7 milyard dollardan çox ixrac, 1,6 milyard dollardan çox idxal qeydə alınıb.
142 ölkə ilə ticarət əməliyyatı aparıldığı, gömrük orqanlarının büdcəyə 593,4 milyon manat vəsait ödədiyi vurğulanır.
Rəsmi məlumata əsasən, ixracın 9,2 faizi Müstəqil Dövlətlər Birliyi (MDB) ölkələrinin, 53,6 faizi Avropa İttifaqı ölkələrinin, 37,2 faizi başqa ölkələrin payına düşüb.
İdxalda MDB-nin payı 21 faiz, Avropa İttifaqının payı 20,7 faiz, başqa ölkələrin payı 58,3 faiz göstərilir.
Yanvar-fevral aylarında əsas tərəfdaş İtaliya olub, bu ölkə ilə ticarət ümumi dövriyyənin 24,9 faizi həcmində rəsmiləşib.
İxracda əsas ölkə İtaliya (ümumi ixracın 37,5 faizi), idxalda Rusiyadır (15,1 faiz).
Hesabata görə, ixracın 88,1 faizindən çoxu neft-qaz sektoruna daxil olan mallardır.
İdxalda ən böyük pay maşın, mexanizm, elektrik avadanlıqları və onların hissələrinin payına düşür: 29,3 faiz.
İki ay ərzində gömrük orqanları 54 cinayət xarakterli fakt, 3897 inzibati xəta qeydə alıb.
