General-leytenant Rövşən Əkbərov həbs edilib
General-leytenant Rövşən Əkbərov həbs edilib. Martın 16-da Baş Prokurorluğun mətbuat xidmətindən AZƏRTAC-a bildiriblər ki, Rövşən Əkbərov İstintaq İdarəsinin apardığı cinayət işi üzrə tutulub, ictimaiyyətə ətraflı məlumat daha sonra veriləcək.
Novator.az bildirir ki, 1965-ci il təvəllüdlü Rövşən Əkbərov Kiyev Ali Ümumqoşun Komandirləri Məktəbinin məzunudur. SSRİ Silahlı Qüvvələrində və Azərbaycan Ordusunda xidmət edib. Əfqanıstan və Qarabağ müharibələrinin veteranıdır. 1994-cü ildə Azərbaycanın Milli Qəhrəmanı fəxri adı alıb.
Azərbaycan Ordusunun birlik komandiri olan Rövşən Əkbərovun ehtiyata buraxıldığı bu il fevralın 8-də yayılıb. Həmin gün daha bir birlik komandiri – general-mayor Xəqani Cəbrayılovun da ehtiyata buraxıldığı xəbər verilib.
Daha əvvəl – yanvarın 28-də isə general-polkovnik Nəcməddin Sadıqovun hərbi xidməti tərk etdiyi açıqlanıb. Nəcməddin Sadıqov 1992-ci ildən Azərbaycan Silahlı Qüvvələrində briqada komandiri, korpus komandiri, cəbhə komandanının birinci müavini-Səhra İdarəetmə Qərargahının rəisi vəzifələrini tutub, 1993-cü il noyabrın 2-dən Silahlı Qüvvələrin Baş Qərargah rəisi-müdafiə nazirinin birinci müavini olub.
