Azərbaycanın “Avroviziya 2021” beynəlxalq mahnı müsabiqəsindəki təmsilçisi Samirə Əfəndi “Mata Hari” mahnısını ifa edəcək.
Mayın 18-dən 22-dək Niderlandın Rotterdam şəhərində, “Ahoy” konsert zalında keçiriləcək yarışmaya ümumilikdə 40 ölkə qatılır.
1991-ci il aprelin 17-si Bakıda doğulan Samirə Əfəndi fortepiano ixtisası və estrada musiqi sənəti üzrə təhsil alıb. Yerli və beynəlxalq musiqi yarışlarının fəal iştirakçısı kimi tanınıb.
“Avroviziya” ictimai teleradiolar qurumu olan Avropa Yayım Birliyinin layihəsidir. 1956-cı ildən keçirilir.
Azərbaycan “Avroviziya”ya 2008-ci ildən qatılır. 2008-ci ildə Elnur Hüseynov və Samir Cavadzadə 8-ci, 2009-cu ildə Aysel Teymurzadə və Araş 3-cü, 2010-cu ildə Səfurə Əlizadə 5-ci, 2011-ci ildə Nigar Camal və Eldar Qasımov 1-ci, 2012-ci ildə Səbinə Babayeva 4-cü, 2013-cü ildə Fərid Məmmədov 2-ci, 2014-cü ildə Dilarə Kazımova 22-ci, 2015-ci ildə Elnur Hüseynov 12-ci, 2016-cı ildə Səmra Rəhimli 17-ci, 2017-ci ildə Diana Hacıyeva 14-cü, 2019-cu ildə Çingiz Mustafayev 8-ci yeri tutub.
“Avroviziya 2018”dəki təmsilçi Aysel Məmmədova yarımfinalda ələnib.
