Naxçıvan rəsmi hesabatda
Naxçıvan Muxtar Respublikasının Dövlət Statistika Komitəsi yeni hesabat yayıb. Novator.az bildirir ki, rəsmi məlumata görə, 2021-ci ilin yanvar-fevral aylarında muxtar respublikada ümumi daxili məhsul istehsalı ötən ilin eyni dövrünə nəzərən müqayisəli qiymətlər üzrə 0,3 faiz artıb.
2020-ci ilin ilk iki ayı ilə müqayisədə sənayedə 1 faiz, kənd təsərrüfatında 4,4 faiz (hər iki sahədə müqayisəli qiymətlər üzrə), sərmayə qoyuluşunda 4,4 faiz, informasiya və rabitə xidmətlərində 8,2 faiz yüksəlişin qeydə alındığı xəbər verilir.
Qeyd olunur ki, nəqliyyat sektorunda yük daşınması 2020-ci ilin yanvar-fevral aylarına nəzərən 0,7 faiz artıb, pərakəndə əmtəə dövriyyəsi 2,2 faiz, əhaliyə göstərilən ödənişli xidmətlər 2,7 faiz (sonuncu iki sahədə müqayisəli qiymətlər üzrə) geriləyib.
2020-ci ilin ilk iki ayı ilə müqayisədə xarici ticarət dövriyyəsində 10 faiz, ixracda 0,8 faiz, idxalda 34,2 faiz artımın qeydə alındığı bildirilir.
Hesabata əsasən, 2021-ci il fevralın 1-nə muxtar respublika iqtisadiyyatında orta aylıq əməkhaqqı 536 manat olub.
