Büdcə qiymətindən 28,04 dollar baha
AZƏRTAC-ın 10 mart məlumatına görə, Azərbaycan nefti “AzəriLayt”ın barreli 68,04 dollara satılır. Bu, büdcə qiymətindən 28,04 dollar yuxarı qiymətdir.
Azərbaycanın 2021-ci il büdcəsində bir barrel neftin qiyməti 40 dollardan götürülüb. “AzəriLayt” yanvara 50,92, fevrala 56,68, marta 65,66 dollarla başlayıb.
Beynəlxalq razılaşmaya görə, Azərbaycan 2021-ci ilin yanvar-aprel aylarında gündəlik xam neft hasilatını 595 min barrel həcmində saxlamalıdır. Bu, OPEK ölkələri (Anqola, Birləşmiş Ərəb Əmirlikləri, Ekvador, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsinin (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) birgə qərarı əsasında müəyyənləşmiş həddir.
Energetika Nazirliyi yanvar ayının gündəlik xam neft hasilatını 593 min barrel göstərib.
