Bələdiyyələrlə İş Mərkəzi hesabat verib
Ədliyyə Nazirliyinin Bələdiyyələrlə İş Mərkəzi Milli Məclisin 9 mart iclasında 2020-ci ilin hesabatını verib. AZƏRTAC bildirir ki, bələdiyyə hesabatını ədliyyə nazirinin müavini Vilayət Zahirov təqdim edib.
Hesabata görə, 2020-ci ildə Ədliyyə Nazirliyində 79858, o cümlədən Naxçıvan Muxtar Respublikasının Ədliyyə Nazirliyində 2670 bələdiyyə aktına inzibati nəzarət qaydasında baxılıb, 76433 akt qanunvericiliyə uyğun sayılıb: “Bələdiyyələrin fəaliyyəti ilə bağlı 3206 müraciətə baxılıb və bu müraciətlərin 164-ü tam və ya qismən təmin edilib. Bələdiyyə aktlarına və müraciətlərə baxılması nəticəsində qanunvericiliyin tələblərinə zidd olan 3267 bələdiyyə aktının dəyişdirilməsi və ya ləğvi üçün müraciət olunub. Bu təkliflər əsasında bələdiyyələr 1666 aktı ləğv edib, 1384 aktı dəyişdirib. Bələdiyyələrin təmin etmədiyi 15 təklif üzrə məhkəmələrdə qaldırılmış iddialardan 2-si təmin olunub.
Təklif və ya iddiaların təmini nəticəsində bütövlükdə 8217 hektar torpaq sahəsinin bələdiyyə mülkiyyətinə və ya sahibliyinə qaytarılması təmin edilib. 138 bələdiyyə sədri inzibati məsuliyyətə cəlb olunub. 23 halda ciddi qanun pozuntuları aşkar edilərək toplanmış sənədlər hüquqi qiymət verilməsi üçün istintaq orqanlarına göndərilib. Həmin materiallardan 10-u üzrə cinayət işi başlanıb”.
