İmtahan qaydalarında yenilik
Nazirlər Kabineti ümumi təhsil pilləsində yekun attestasiyanın aparılması qaydalarını dəyişib. Novator.az bildirir ki, yeniliyə görə, epidemiya əleyhinə rejimin, sanitariya-gigiyena və karantin rejimlərinin qüvvədə olduğu müddətdə buraxılış imtahanı bir mərhələdən ibarət olur. Dövlət İmtahan Mərkəzi attestasiyanı Azərbaycan, rus və gürcü dillərində tədris aparılan ümumi təhsil müəssisələrində tədris dili, xarici dil və riyaziyyat fənlərindən, ingilis, fransız dillərində və digər dillərdə tədris aparılan ümumi təhsil müəssisələrində xarici dil və riyaziyyat fənlərindən olmaqla mərkəzləşdirilmiş qaydada keçirir.
Buraxılış imtahanında şagirdlərə tədris dili fənnindən 30, xarici dil fənnindən 30, riyaziyyat fənnindən 25 tapşırıq təqdim edilir. Buraxılış imtahanında şagirdlərin toplaya biləcəyi maksimal bal hər fənn üzrə 100 bal olmaqla cəmi 300 baldır. İmtahanın davametmə müddəti 3 saatdır (buraxılış imtahanını yalnız xarici dil və riyaziyyat fənlərindən verən şagirdlər üçün 2 saat).
Başqa bir qərarla orta ixtisas təhsili müəssisələrinə ümumi orta təhsil bazasında tələbə qəbulu qaydaları yenilənib. Epidemiya əleyhinə rejimin, sanitariya-gigiyena və karantin rejimlərinin qüvvədə olduğu müddətdə qəbul imtahanı mərkəzləşdirilmiş qaydada bir mərhələdə keçirilir. Abituriyentlərə Azərbaycan və ya rus dili fənnindən 30, xarici dil fənnindən 30, riyaziyyat fənnindən 25 tapşırıq təqdim edilir. Bu mərhələdə abituriyentlərin toplaya biləcəyi maksimal bal hər fənn üzrə 100 bal olmaqla cəmi 300 baldır. İmtahanın davametmə müddəti 3 saatdır.
Azərbaycanda koronavirus pandemiyası üzündən xüsusi karantin rejimi hökm sürür. 2020-ci il martın 31-dən tətbiq olunan rejim bu il aprelin 1-dək qüvvədə olmalıdır.
2019-cu ilin dekabrında Çində üzə çıxaraq dünyanı bürüyən koronavirus infeksiyasına Azərbaycanda ilk yoluxma 2020-ci il fevralın 28-də qeydə alınıb, bu il martın 5-dək 3232 xəstə vəfat edib.
