Əmək və Əhalinin Sosial Müdafiəsi Nazirliyinin 4 mart məlumatına görə, Azərbaycanda pensiyaların orta aylıq məbləği 330 manata çatıb.

Yaşa görə pensiyaların orta aylıq məbləği 361 manat, əlilliyə görə pensiyaların orta aylıq məbləği 290 manat, ailə başçısını itirməyə görə pensiyaların orta aylıq məbləği 267 manat göstərilir.

Azərbaycanda minimum pensiya 200 manatdır.

2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin vaxtdan bəri yaş həddi artırılır. 2021-ci il iyulun 1-dək kişilərin, 2027-ci il iyulun 1-dək qadınların pensiya yaşı 65-ə çatacaq.

İlkin məlumata əsasən, 2021-ci ilin əvvəlinə Azərbaycanda 1 milyon 232,2 min nəfər pensiyaçı olub.