Pensiyaçıların sayı necə dəyişib?
2010-cu ilin əvvəli ilə müqayisədə Azərbaycanda pensiyaçıların sayı 76,2 min nəfər azalıb.
İlkin məlumata əsasən, 2021-ci ilin əvvəlinə Azərbaycanda 1 milyon 232,2 min nəfər pensiyaçı olub.
Novator.az bildirir ki, Dövlət Statistika Komitəsi 2010-cu ilin əvvəlinə pensiyaçıların sayını 1 milyon 308,4 min nəfər göstərib.
2011-ci ilin əvvəlinə pensiyaçıların sayı 1 milyon 292,2 min nəfərə, 2012-ci ilin əvvəlinə 1 milyon 277,6 min nəfərə, 2013-cü ilin əvvəlinə 1 milyon 272,1 min nəfərə düşüb.
2014-cü ilin əvvəlinə 1 milyon 277,1 min nəfər pensiyaçı qeydə alınıb.
2015-ci ilin əvvəlində 1 milyon 290,9 min nəfər, 2016-cı ilin əvvəlində 1 milyon 299,9 min nəfər, 2017-ci ilin əvvəlində 1 milyon 315,2 min nəfər, 2018-ci ilin əvvəlində 1 milyon 318,4 min nəfər pensiyaçı olub.
2019-cu ilin əvvəlinə pensiyaçıların sayı 1 milyon 295,5 min nəfərə, 2020-ci ilin əvvəlinə 1 milyon 270,6 min nəfərə enib.
Minimum pensiya 200 manatdır.
Əmək və Əhalinin Sosial Müdafiəsi Nazirliyi pensiyaların orta aylıq məbləğini 298 manat göstərir.
2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin vaxtdan bəri yaş həddi artırılır. 2021-ci il iyulun 1-dək kişilərin, 2027-ci il iyulun 1-dək qadınların pensiya yaşı 65-ə çatacaq.
Qanuna görə, əmək pensiyası yaşına çatmış şəxsin əmək pensiyasının minimum məbləğindən az olmayan pensiya təminatına imkan verən pensiya kapitalı (hazırda 28800 manatdır) və ya azı 25 il sığorta stajı olmalıdır.
