Xurma, pambıq mahlıcı, meşə fındığı
İqtisadi İslahatların Təhlili və Kommunikasiya Mərkəzi ixrac icmalı yayıb. Novator.az bildirir ki, rəsmi hesabata görə, 2021-ci ilin yanvarında 146 milyon dollarlıq qeyri-neft ixracı qeydə alınıb, bu, 2020-cu ilin ilk ayına nəzərən 3,7 faiz çoxdur.
Türkiyəyə 52,7 milyon, Rusiyaya 42,8 milyon, İsveçrəyə 10 milyon, Gürcüstana 6,4 milyon, Çinə 4,3 milyon dollar dəyərində qeyri-neft məhsulunun ixrac olunduğu vurğulanır: “İxrac edilən malların siyahısında xurma 16,7 milyon dollarla birinci, pambıq mahlıcı 14,3 milyon dollarla ikinci, qabığı təmizlənmiş meşə fındığı 10,2 milyon dollarla üçüncü olub”.
2021-ci ilin ilk iki ayı üzrə meyvə-tərəvəz ixracı 37 milyon, pambıq lifi ixracı 14,3 milyon, alüminium və ondan hazırlanan məmulatların ixracı 13,8 milyon, qara metallar və onlardan hazırlanan məmulatların ixracı 7,8 milyon, pambıq ipliyi ixracı 3,2 milyon, kimya sənayesi məhsullarının ixracı 3 milyon, bitki və heyvan mənşəli piylər və yağların ixracı 1,7 milyon, şəkər ixracı 1,5 milyon, spirtli və spirtsiz içkilərin ixracı 1 milyon, çay ixracı 760 min dollar göstərilir.
Dövlət Gömrük Komitəsinin hesabatına görə, yanvar ayında Azərbaycanın xarici ticarət əməliyyatlarının həcmi 2 milyard 411,5 milyon dolları ötüb, 1 milyard 624 milyon dollardan çox ixrac qeydə alınıb. İxracın 91 faizindən çoxu neft-qaz sektoruna daxil olan mallardır.
