“Pfizer”-“BioNTech” peyvəndinin daha bir üstünlüyü üzə çıxıb
ABŞ-ın “Pfizer” şirkəti ilə Almaniyanın “BioNTech” şirkətinin birgə istehsal etdiyi koronavirus əleyhinə peyvəndin daha bir üstünlüyü üzə çıxıb.
Bu peyvəndin insanları koronavirus xəstəliyindən müdafiə məsələsində 90%-dən artıq effekt verdiyi ötən ildən bəllidir. İndi vaksin istehsalçılarının İsrailin Səhiyyə Nazirliyi ilə birgə apardığı araşdırma göstərib ki, “Pfizer”-“BioNTech” peyvəndi virusun bir adamdan başqasına keçməsinin də qarşısını alır. Vaksin bu məsələdə 89,4% effekt verib.
Novator.az-ın məlumatına görə, bunu Almaniyanın “Şpigel” jurnalı yazıb.
Jurnal qeyd edib ki, “BioNTech” şirkətinin baş direktoru Uğur Şahin vaksinin virusun yayılmasının qarşısını almaqda 60% effekt verəcəyini düşünürmüş. İsrailin Səhiyyə Nazirliyi ilə birgə aparılan araşdırma daha yüksək nəticə göstərib: 89,4%. Araşdırma “Pfizer”-“BioNTech” vaksini ilə peyvəndlənmiş 1,7 milyon nəfər üzərində aparılıb.
İsraildə əhali “Pfizer”-“BioNTech” vaksini ilə peyvənd olunur.
İsrail əhalinin koronavirusa qarşı peyvəndlənməsi prosesində dünyada ilk yerdə durur.
“Şpigel”in yazdığına görə, araşdırma hələ tam yekunlaşmadığından “Pfizer” və “BioNTech” şirkətləri məsələ ilə bağlı rəsmi açıqlama verməyə tələsmir.
“Pfizer”-“BioNTech” vaksini dünyanın bir çox ölkəsində tətbiq olunur. Bu vaksinlə peyvəndlənən bəzi insanlarda ötəri narahatlıqlar yaransa da, problem ümumi nəticəyə mənfi təsir etməyib.
2019-cu ilin dekabrında Çində üzə çıxıb dünyanı bürüyən koronavirus infeksiyası 203 ölkə, ərazi və məkanda 2,5 milyondan çox adamın ölümünə səbəb olub.
Mənbə: Spiegel.de
