Gənc fəal niyə tutulub?
“Nida” Vətəndaş Hərəkatının üzvü Elmir Abbasov 30 sutka inzibati həbs cəzası alıb. Meydan.tv-nin məlumatına görə, Sumqayıt Şəhər Məhkəməsi onu İnzibati Xətalar Məcəlləsinin 206-cı maddəsinin (Qanunsuz olaraq narkotik vasitələrin, psixotrop maddələrin istehlakı, satış məqsədi olmadan şəxsi istehlak miqdarında hazırlanması, əldə edilməsi, saxlanılması, daşınması və ya göndərilməsi) pozuntusunda təqsirli bilib.
“Nida”nın açıqlamasında qeyd olunur ki, Elmir Abbasov bir neçə gün əvvəl yoxa çıxıb, fevralın 22-də onun haqqında həbs qərarı çıxarıldığı bilinib. Sumqayıt Şəhər Polis İdarəsində saxlanan gənc fəala cəza fevralın 20-də kəsilib. Məhkəmə qərarında Elmir Abbasovun üstündən narkotik maddə tapıldığı qeyd olunub.
“Nida” bildirir ki, Elmir Abbasovun həbsi siyasi və ictimai fəaliyyəti, sosial şəbəkələrdə yazdığı tənqidi statusları ilə bağlıdır: “Elmir Abbasovun inzibati həbsi siyasi fəallara qarşı təqib və repressiyaların növbəti nümunəsidir. Azərbaycanda sivil və ədalətli siyasi mühitin yaranmasının başlıca şərti siyasi repressiyaların dayandırılması və bütün siyasi məhbusların azad edilməsidir”.
Elmir Abbasov haqqında həbs qərarından apellyasiya şikayəti veriləcəyi bildirilir.
2011-ci ildə yaradılan “Nida” Vətəndaş Hərəkatının məramı Azərbaycanda vətəndaş cəmiyyəti, demokratik, hüquqi dövlətin qurulmasıdır.
Quruma rəhbərliyi İdarə Heyəti həyata keçirir.
