Yeni savaş təhlükəsi?
AXCP sədri Əli Kərimli Rusiyanın Ermənistanı Azərbaycanla ehtimal olunan yeni savaşa hazırladığı qənaətindədir. Novator.az-ın məlumatına görə, AXCP sədri özünün “Facebook” səhifəsində yazır ki, Rusiya darmadağın edilmiş Ermənistan Ordusunu ürəkləndirmək üçün 102 saylı hərbi bazasını böyüdüb onun bir hissəsini Ermənistanın şərqinə – Qarabağa yaxın əraziyə köçürmək niyyətindədir: “Bununla Ermənistanın revanşist dairələrinə mesaj verirlər ki, Qarabağdakı erməni separatçılarını müdafiə etmək üçün “sülhməramlılar” kifayət etməsə, ən qısa vaxtda ora əlavə hərbi hissələr də göndərə biləcəklər.
İkincisi, Ermənistan və Rusiya Müdafiə nazirliklərinin ekspertləri Ermənistan Ordusunun yenidən qurulması və müasir silahlarla silahlandırılması proqramı üzərində işləyirlər. Ermənistan müdafiə nazirinin dediyinə görə, ordunun yenidən silahlandırılması zamanı İkinci Qarabağ savaşının nəticələrini nəzərə alırlar, ordunu yeni silah kompleksləri və sistemləri ilə silahlandırma, hərbi xidmətə müqavilə əsasında (peşəkar) daha çox hərbçinin cəlb edilməsi əsas prioritet hesab olunur.
Bir neçə həftə öncə Qarabağdakı qondarma rejimin “Təhlükəsizlik Şurasının katibi”, Xocalı qatili Vitali Balasanyan da müqavilə əsasında peşəkarlardan ibarət ordu quracaqlarını anons etmişdi. Həm Ermənistan, həm də Qarabağ separatçıları üçün ordu quran da, Ermənistanın Qarabağa yaxın ərazisində faktiki ikinci hərbi baza yerləşdirən də, təəssüf ki, məhz Rusiyadır.
Azərbaycan iqtidarı ölkəmizə qarşı yeni savaş təhlükəsi yaradan bu kimi hərəkətləri susqunluqla yola verir. Heç separatçıların Xankəndində “dirçəlişin” 33-cü ilini təntənə ilə qeyd etmələrinə də səslərini çıxarmadılar. Üstəlik, yeni təhlükələr qarşısında orduya diqqət və qayğını artırmaq əvəzinə qazilərimizin əlillik dərəcəsini kəsirlər ki, onlara az müavinət verilsin, ön cəbhədə xidmət edən hərbçilərimizin isə əmək haqlarını da azaldıblar. Qazilərdən, hərbçilərdən pul kəsib qənaət edirlər ki, yeni tikililər bəhanəsi ilə daha çox pul oğurlaya bilsinlər. Savaş bitməsə də, dayanıb, eyforiya keçib, şəhid ailələri, qazilər, veteranlar, ön cəbhədə xidmət edən hərbçilər də, çox təəssüf ki, öz dərdləri, problemlərilə təkbətək buraxılıblar”.
1988-ci il fevralın 13-dən Dağlıq Qarabağ Muxtar Vilayətində bölgənin Ermənistana verilməsi tələbi ilə separatçı hərəkat başlayıb. Fevralın 20-də Dağlıq Qarabağ Muxtar Vilayətinin Xalq Deputatları Soveti SSRİ, Azərbaycan və Ermənistan hakimiyyətləri qarşısında vəsatət qaldırıb. Vəsatətdə vilayətin Ermənistana birləşdirilməsi istəyi yer alıb, bununla separatçı hərəkat açıq təcavüzə çevrilib.
1991-ci il sentyabrın 2-də Dağlıq Qarabağ erməniləri bölgəni “müstəqil dövlət” elan edib. Bunun ardınca başlayan savaşda Ermənistan Dağlıq Qarabağı və onun ətrafındakı bölgələri ələ keçirib. 1994-cü ilin mayında atəşkəs elan olunub.
2020-ci il sentyabrın 27-dən Azərbaycan Ordusunun keçirdiyi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının və keçmiş Ağdərə rayonunun bir çox qəsəbə və kəndi azad olunub.
Noyabrın 10-da hərbi əməliyyatlar dayandırılıb, Dağlıq Qarabağa və bölgədən Ermənistana gedən Laçın yoluna Rusiyanın hərbi kontingenti yeridilib.
Ermənistan dekabrın 1-dək Ağdam, Kəlbəcər və Laçın rayonlarını Azərbaycana qaytarıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun böyük hissəsi ermənilərin, Laçın şəhəri və rayonun bir neçə kəndi Rusiya hərbçilərinin nəzarətində qalıb.
