Xarici ticarətin ilk ayı
2021-ci ilin ilk xarici ticarət statistikası açıqlanıb. Novator.az bildirir ki, Dövlət Gömrük Komitəsinin hesabatına görə, yanvar ayında Azərbaycanın xarici ticarət əməliyyatlarının həcmi 2 milyard 411,5 milyon dolları ötüb, 1 milyard 624 milyon dollardan çox ixrac, 787,5 milyon dollardan çox idxal qeydə alınıb.
122 ölkə ilə ticarət əməliyyatı aparıldığı, gömrük orqanlarının büdcəyə 282,7 milyon manat vəsait ödədiyi vurğulanır.
Rəsmi məlumata əsasən, ixracın 10,1 faizi Müstəqil Dövlətlər Birliyi (MDB) ölkələrinin, 61,1 faizi Avropa İttifaqı ölkələrinin, 28,8 faizi başqa ölkələrin payına düşüb.
İdxalda MDB-nin payı 20,5 faiz, Avropa İttifaqının payı 22,9 faiz, başqa ölkələrin payı 56,6 faiz göstərilir.
Yanvarda əsas tərəfdaş İtaliya olub, bu ölkə ilə ticarət ümumi dövriyyənin 30,8 faizi həcmində rəsmiləşib.
İxracda əsas ölkə İtaliya (ümumi ixracın 44,4 faizi), idxalda Rusiyadır (14,6 faiz).
Hesabata görə, ixracın 91 faizindən çoxu neft-qaz sektoruna daxil olan mallardır.
İdxalda ən böyük pay maşın, mexanizm, elektrik avadanlıqları və onların hissələrinin payına düşür: 29,5 faiz.
