Fevralın 22-də Gürcüstan parlamenti yeni hökumətin tərkibini təsdiqləyib. Səsverməyə qatılan 91 deputatın yalnız 2-si yeni hökumətə etimadın əleyhinə çıxıb.

Hakim Gürcü Arzusu – Demokratik Gürcüstan Partiyasının qurduğu hökumətə İrakli Qaribaşvili baş nazirlik edir.

1982-ci il təvəllüdlü İrakli Qaribaşvili Gürcü Arzusu – Demokratik Gürcüstan Partiyasının qurucularındandır. 2012-2013-cü illərdə daxili işlər naziri, 2013-2015-ci illərdə baş nazir olub, 2019-cu ildən müdafiə naziri postunu tutub.

Novator.az bildirir ki, yeni hökumətdə bu şəxslər yer alır:

David Zalkaliani – xarici işlər naziri

Cuanşer Burçuladze – müdafiə naziri

Qoça Lortkipanidze – ədliyyə naziri

Vaxtanq Qomelauri – daxili işlər naziri

İvane Maçavariani – maliyyə naziri

Natiya Turnava – iqtisadiyyat və davamlı inkişaf naziri

Levan Davitaşvili – ətraf mühit və kənd təsərrüfatı naziri

İrakli Karseladze – regional inkişaf və infrastruktur naziri

Mixail Çxenkeli – təhsil, elm, mədəniyyət və idman naziri

Yekaterina Tikaradze – məcburi köçkünlərlə iş, əmək, səhiyyə və sosial müdafiə naziri

Teya Axvlediani – barışıq məsələləri və vətəndaş bərabərliyi üzrə dövlət naziri.

Əvvəlki baş nazir Georgi Qaxariya fevralın 18-də istefa verib.

2012-ci ildə yaradılmış Gürcü Arzusu – Demokratik Gürcüstan Partiyası həmin il və 2016-cı ildə keçirilmiş parlament seçkilərində çoxluq əldə edərək hökumət qurub.

Partiya 2020-ci ildə iki turda – oktyabrın 31-i və noyabrın 21-də keçirilmiş parlament seçkisini udub, 150 yerlik qanunverici orqanda 90 mandata sahib çıxıb. Hökumət qurmaq üçün 76 mandat kifayətdir.