Aksiya davam edir
Məhbus jurnalist Polad Aslanov Bakı İstintaq Təcridxanasından paytaxtın Nizami rayonunda yerləşən 1 saylı Cəzaçəkmə Müəssisəsinə köçürülüb. Novator.az bildirir ki, jurnalistin həyat yoldaşının fevralın 22-də yaydığı məlumata görə, Beynəlxalq Qızıl Xaç Komitəsinin nümayəndələri cəzaçəkmə müəssisində Polad Aslanova baş çəkiblər.
Polad Aslanovun aclıq aksiyasını davam etdirdiyi vurğulanır.
Xeberman.com və Press-az.com saytlarının baş redaktoru olan Polad Aslanovu 2019-cu il iyunun 12-də Dövlət Təhlükəsizliyi Xidməti həbs edib, ona dövlətə xəyanət ittihamı verilib.
Rəsmi açıqlamaya görə, Polad Aslanov xarici xüsusi xidmət orqanlarının əməkdaşları ilə ölkədən kənarda məxfi görüşlər keçirib, maddi maraq müqabilində əməkdaşlığa cəlb edilib: “O, xarici xüsusi xidmət orqanlarının əməkdaşlarından aldığı tapşırıqlar əsasında topladığı məlumatları Azərbaycanın dövlət təhlükəsizliyi və müdafiə qabiliyyəti zərərinə həmin orqanlara ötürüb, onların tapşırığı ilə mətbuatda, sosial şəbəkələrdə dövlət əleyhinə, hüquq mühafizə orqanlarının qanuni fəaliyyətini nüfuzdan salmağa yönəlmiş yazılar yayımlaması razılaşdırılıb”.
2020-ci il noyabrın 16-da Bakı Ağır Cinayətlər Məhkəməsi jurnalistə 16 il azadlıqdan məhrumetmə cəzası kəsib.
Hökmdən Bakı Apellyasiya Məhkəməsinə şikayət edən Polad Aslanov fevralın 1-də keçirilən ilk prosesdə qanunsuz tutulub məhkum olunduğunu, hüquqlarının pozulduğunu vurğulayaraq aclıq aksiyasına başlayıb.
Fevralın 15-də Bakı Apellyasiya Məhkəməsi Polad Aslanova ilkin məhkəmə instansiyasında çıxarılmış hökmü qüvvədə saxlayıb.
