Xarici valyuta: nağd əməliyyatlar 13,3% azalıb
Mərkəzi Bank 2020-ci il üzrə pul siyasəti icmalı yayıb. Novator.az bildirir ki, hesabata görə, 2020-ci ildə valyuta bazarında əməliyyatların həcmi azalıb: “Nağdsız valyuta bazarında əməliyyatların həcmi əvvəlki ilə nəzərən 6,7% azalaraq 25,9 milyard ABŞ dolları ekvivalentində olub. Əməliyyatların 86,5%-i ABŞ dollarında, 13.5%-i digər valyutalarda aparılıb.
Bankların nağd xarici valyutanın alış və satışı üzrə apardığı əməliyyatların həcmi əvvəlki ilə nəzərən 13,3% düşərək 5,2 milyard ABŞ dolları ekvivalentində rəsmiləşib. Bunun 86,7%-ni ABŞ dolları ilə aparılmış əməliyyatlar təşkil edib. 2020-ci ildə Mərkəzi Bankda 102 valyuta hərracı keçirilib”.
Qeyd olunur ki, il ərzində manatla pul bazası 11,6% artaraq 13,6 milyard manata çatıb.
2015-ci ilin devalvasiyaları nəticəsində dolların rəsmi məzənnəsi 0,7844 manatdan 1,5594 manata yüksəlib.
2016-cı ildə rəsmi qiymət 1,7707 manata çatıb.
2017-ci ilin fevralında maksimal qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən banklara 1,7 manata təklif olunur.
Dövlət Neft Fondu Mərkəzi Bankın 2021-ci ilin yanvar ayında keçirdiyi valyuta hərraclarında 644,9 milyon ABŞ dolları məbləğində vəsait satıb.
2016-2020-ci illərin valyuta hərraclarında Dövlət Neft Fondundan 28,9 milyard dollar məbləğində vəsait alınıb. Manatı qorumağa 2016-cı ildə 4,9 milyard, 2017-ci ildə 3,6 milyard, 2018-ci ildə 6,5 milyard, 2019-cu ildə 6,6 milyard, 2020-ci ildə 7,3 milyard dollar sərf edilib.
Mərkəzi Bankın rəsmi hesabatına görə, fevralın 1-nə valyuta ehtiyatının həcmi 6 milyard 365,2 milyon dollar olub. 2021-ci il 6 milyard 369,4 milyon dollarla başlamışdı.
2015-ci ilin əvvəlinə valyuta ehtiyatı 13 milyard 758,3 milyon dollar göstərilib, ilin sonuna ehtiyatın həcmi 5 milyard 16,7 milyon dollara enib.
2017-ci ilin əvvəlinə ehtiyat 3 milyard 974,4 milyon dollar, 2018-ci ilin əvvəlinə 5 milyard 334,6 milyon dollar, 2019-cu ilin əvvəlinə 5 milyard 625,7 milyon dollar, 2020-ci ilin əvvəlinə 6 milyard 258 milyon dollar həcmində rəsmiləşib.
