Qaribaşvili baş nazirliyə qayıdır
Gürcüstanda yeni hökumət qurulur. Hakim Gürcü Arzusu – Demokratik Gürcüstan Partiyası baş nazir postuna İrakli Qaribaşvilini namizəd irəli sürüb.
Novator.az bildirir ki, İrakli Qaribaşvili 1982-ci ildə paytaxt Tbilisidə doğulub. Tbilisi Dövlət Universitetinin beynəlxalq münasibətlər fakültəsini bitirib, həmçinin Fransanın paytaxtı Parisdəki Sorbonna Universitetində beynəlxalq münasibətlər üzrə təhsil alıb.
Gürcü Arzusu – Demokratik Gürcüstan Partiyasının qurucularındandır. 2012-2013-cü illərdə daxili işlər naziri, 2013-2015-ci illərdə baş nazir olub, 2019-cu ildən müdafiə naziridir.
Əvvəlki baş nazir Georgi Qaxariya fevralın 18-də istefa verib. 1975-ci il təvəllüdlü Georgi Qaxariya hökumətə 2019-cu il sentyabrın 8-dən rəhbərlik edib.
2012-ci ildə yaradılmış Gürcü Arzusu – Demokratik Gürcüstan Partiyası həmin il və 2016-cı ildə keçirilmiş parlament seçkilərində çoxluq əldə edərək hökumət qurub.
Partiya 2020-ci ildə iki turda – oktyabrın 31-i və noyabrın 21-də keçirilmiş parlament seçkisini udub, 150 yerlik qanunverici orqanda 90 mandata sahib çıxıb. Hökumət qurmaq üçün 76 mandat kifayətdir.
