Kölgədə qalan nədir?
İqtisadiyyat naziri Mikayıl Cabbarov gələcək planlardan danışarkən deyib ki, Azərbaycan iqtisadiyyatının strateji hədəflərinə yönələn vergi siyasəti biznes üçün təşviq xarakteri daşımalı, kölgə iqtisadiyyatı ilə mübarizə, ədalətli rəqabət mühitinin dəstəklənməsi davam etdirilməlidir.
Novator.az-ın məlumatına görə, nazirin bəyanatını şərh edən iqtisadçı Rövşən Ağayev yazır ki, kölgə iqtisadiyyatı ilə mübarizə, onun ən aşağı həddə qədər məhdudlaşdırılması çox vacibdir: “Amma nazir nədən kölgə iqtisadiyyatının real miqyasının nə qədər olduğunu açıqlamır? Niyə ayrı-ayrı sahələrdə qara iqtisadiyyatın payının nə qədər olduğu bəyan edilmir?
Kölgədə gizlənən, müqaviləsiz işləyən muzdlu işçilərin mümkün sayı nə qədərdir? Qeyri-rəsmi əməkhaqqı fondu nə qədərdir? Biznesin gizlətdiyi real dövriyyə nə qədərdir, bu dövriyyədə real olaraq nə qədər mənfəət və vergi gizlənir?
Niyə bu suallara cavab verən bir rəsmi araşdırma, bu araşdırmaya əsaslanan kölgə iqtisadiyyatı ilə mübarizə strategiyası olmamalıdır?
Bunlar olmayandan sonra “kölgə iqtisadiyyatı ilə mübarizə davam etdirilməlidir” bəyanatı çox sönük səslənir”.
