5252 cinayət
Dövlət Statistika Komitəsi Daxili İşlər Nazirliyinə istinadla bildirir ki, 2020-ci ildə Azərbaycanda qeydə alınmış 26004 cinayətin 5252-si narkotik vasitələrin və psixotrop maddələrin qanunsuz dövriyyəsi ilə əlaqədar olub.
Cinayətlərin 55,9 faizinin narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşıma, 36,1 faizinin eyni hərəkətləri satış məqsədilə etmə, habelə bu maddələri istehsal etmə, göndərmə, yaxud satma, 6,2 faizinin tərkibində narkotik maddələr olan bitkiləri kultivasiya etmə, 1,7 faizinin güclü təsir edən və ya zəhərli maddələrin satış məqsədilə qanunsuz dövriyyəsi, 0,1 faizinin digər cinayətlərə aid olduğu vurğulanır.
İl ərzində narkotik vasitələrin və psixotrop maddələrin qanunsuz dövriyyəsi ilə bağlı 4233 nəfər cinayət törətmiş şəxs müəyyən edilib: “Cinayət törətmiş şəxslərin 70,9 faizi heç yerdə işləməyən və oxumayan şəxslər, 2 faizi qadınlardır. Onların 0,1 faizi 14-17 yaşda, 7,6 faizi 18-24 yaşda, 17,4 faizi 25-29 yaşda, 74,9 faizi 30 və yuxarı yaşlı şəxslərdir”.
Hesabata görə, 2020-ci ildə 3 ton 758,4 kiloqram narkotik vasitə və psixotrop maddə müsadirə edilib.
