Kataloniya seçkisi yenə separatçıları önə çıxardı
İspaniyanın Kataloniya vilayətində fevralın 14-də keçirilmiş növbədənkənar parlament seçkisinin ilkin nəticələri açıqlanıb. Novator.az-ın məlumatına görə, bölgənin İspaniyadan ayrılmasını istəyən əsas qüvvələr 135 yerlik parlamentə ümumilikdə 65 mandat qazanıblar: solçu respublikaçılar 33, “Birlikdə Kataloniya uğrunda” bloku 32 yer götürüb.
Sosialist Partiyası 33, Vox Partiyası 11, “Xalq birliyi” bloku 9 mandat əldə edib, qalan 17 mandat üç siyasi quruma qismət olub.
Kataloniyada 2015-ci il sentyabrın 27-də keçirilmiş parlament seçkisində bölgənin İspaniyadan ayrılmasının tərəfdarı olanlar 72, əks mövqedə dayananlar 63 mandat alıb.
Vilayətdə 2017-ci il oktyabrın 1-də keçirilmiş qanunsuz referendumda bölgənin müstəqil dövlət elan olunmasına səs verilib. Bunu əsas tutan Kataloniya parlamenti oktyabrın 27-də müstəqillik qətnaməsi qəbul edib. Oktyabrın 28-də rəsmi Madrid Kataloniya hökumətini və parlamentini buraxıb, idarəçilik səlahiyyətlərinin mərkəzi orqanlara ötürülməsi barədə qərar çıxarıb. Kataloniya hakimiyyətində yer almış bir çox şəxs üsyan və qiyam təşkili, vəzifə səlahiyyətlərindən sui-istifadə, hakimiyyət orqanlarına tabe olmamaq, dövlət vəsaitini mənimsəmə ittihamları ilə həbs edilib.
Həmin il dekabrın 21-də vilayətdə yeni parlament seçkisini də separatçılar udub.
