Füzuli, Zəngilan, Laçın və Cəbrayıl səfəri
Prezident İlham Əliyev fevralın 14-də Füzuli, Zəngilan, Laçın və Cəbrayıl rayonlarına səfər edib.
AZƏRTAC xəbər verir ki, dövlət başçısı öncə Füzulidə Horadiz-Ağbənd dəmir yolu xəttinin təməlini qoyub. Arayışa görə, ümumi uzunluğu 100 kilometr olan bu dəmir yolu xətti azad olunmuş torpaqlara gediş-gəlişin təminatında əhəmiyyətli rol oynayacaq və Azərbaycanın əsas hissəsi ilə Naxçıvan Muxtar Respublikası arasında birbaşa dəmir yolu nəqliyyat əlaqəsinin yaranmasına böyük töhfə verəcək.
Sonra İlham Əliyev Zəngilan rayonunun Üçüncü Ağalı kəndinə gedib. Dövlət başçısına Üçüncü Ağalıda icra olunacaq “ağıllı kənd” layihəsi barədə məlumat verilib. Bildirilib ki, kənddə layihənin icrası əsasən 5 komponent üzrə aparılacaq. Onlar yaşayış, istehsal, sosial xidmətlər, “ağıllı kənd təsərrüfatı”, alternativ enerji sahələridir. İnşa ediləcək 200 evdən ibarət kəndin enerjiyə tələbatı yalnız alternativ enerji mənbələrindən əldə olunacaq.
Daha sonra dövlət başçısı Laçın rayonuna yollanıb. İlham Əliyev Güləbird kəndində Azərbaycan bayrağını qaldırıb və çıxış edib, ardınca Həkəri çayı üzərində yerləşən 8 meqavat gücündə “Güləbird” Su Elektrik Stansiyasının açılışına qatılıb. Qeyd olunub ki, stansiya təxminən 7000 nəfər əhalinin elektrik enerjisi ilə təminatında mühüm rol oynayacaq, burada istehsal olunan elektrik enerjisi Qubadlı rayonunun Xanlıq kəndini, Laçın rayonunun cənub hissəsini və ərazidə yerləşən infrastruktur layihələrini elektrik enerjisi ilə təmin edəcək.
Həmin gün dövlət başçısı Zəngilan rayonundakı Bəsitçay Dövlət Təbiət Qoruğunun ərazisinə də baş çəkib.
Səfər Cəbrayıl rayonunun Soltanlı kəndində başa çatıb.
Ermənistan 1988-1994-cü illərin təcavüzündə Azərbaycanın Dağlıq Qarabağ vilayətini və onun ətrafındakı bölgələrin böyük qismini işğal edib.
2020-ci il sentyabrın 27-dən Azərbaycan Ordusunun keçirdiyi əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının və keçmiş Ağdərə rayonunun bir çox qəsəbə və kəndi azad olunub.
Noyabrın 10-da hərbi əməliyyatlar dayandırılıb, Dağlıq Qarabağa və bu bölgəni Ermənistanla birləşdirən Laçın yoluna Rusiyanın hərbi kontingenti yeridilib.
Ermənistan dekabrın 1-dək Ağdam, Kəlbəcər və Laçın rayonlarını Azərbaycana qaytarıb.
Xankəndi, Xocalı, Ağdərə, Xocavənd şəhərləri, Şuşa, Xocalı, Xocavənd rayonlarının və keçmiş Ağdərə rayonunun böyük hissəsi ermənilərin, Laçın şəhəri və rayonun bir neçə kəndi Rusiya hərbçilərinin nəzarətində qalıb.
