“Azərbaycan mirvarisi – Şuşa”
“Azərbaycan mirvarisi – Şuşa” kitab-albomu çapdan çıxıb. Novator.az-ın məlumatına görə, “Zərdabi Nəşr” MMC-də buraxılan kitabın müəllifi İsmayıl Aydın oğlu İsmayılov, tərtib edəni Xatirə Vaqif qızı Qasımovadır.
XIX əsr Azərbaycan ədəbiyyatının istedadlı söz sənətkarlarından Molla Zeynalabdin ibn Molla Sadıq Sağəri Qarabağinin nəslindən olan şuşalı Elmir Sahib oğlu Babayevin dəstəyi ilə Azərbaycan və rus dillərində ərsəyə gələn kitab-albomda Şuşa şəhərinin tarixinə nəzər salınır. Ən müxtəlif dövrlərə aid fotoşəkillərlə zəngin nəşrdə qədim Şuşanın məhəllələrindən (Seyidli, Quyuluq, Qurdlar, Xoca Mircanlı, Çuxur Məhəllə, Hacı Yusifli, Dördlər Qurdu, Ağadədəli, Çöl qala, Culfalar, Mamayı, Merdinli, Saatlı, Dəmirçilər, Hamamqabağı, Təzə Məhəllə, Köçərli), məscid və bulaqlarından, memarlıq abidələrindən söz açılır.
Kitabın böyük bir bölümündə tanınmış şuşalılar barədə arayışlar yer alır.
“Azərbaycan mirvarisi – Şuşa”da tarixi mənbələrə və sənədlərə, müxtəlif elmi və publisistik nəşrlərə istinadla şəhərin işğaldan əvvəlki və işğal dövründəki durumu təsvir edilir.
Şuşa şəhəri 1750-ci ildən Qarabağ xanlığının paytaxtı, 1822-ci ildən Qarabağ əyalətinin (daha sonra Şuşa qəzasının) baş şəhəri, 1923-cü ildən Azərbaycanın Dağlıq Qarabağ vilayətində rayon mərkəzi olub. 1992-ci il mayın 8-nə keçən gecə Şuşaya hücum edən erməni birləşmələri mayın 9-da şəhəri ələ keçirib və 28 il 6 ay işğalda saxlayıb.
2020-ci il noyabrın 8-də Azərbaycan Ordusu Şuşanı düşmən işğalından azad edib.
