Yoxlamalara yasaq qanunu: müddət uzadılır
Sahibkarlıq sahəsində yoxlamaları dayandıran qanunun qüvvədə olma müddəti uzadılır.
2015-ci il noyabrın 1-də rəsmiləşən qanun yoxlamaları (Baş Prokurorluğun korrupsiya cinayətlərinin araşdırılması üzrə apardığı yoxlamalar istisna olmaqla) iki il müddətinə dayandırıb. 2017-ci ildə müddət 2021-ci il yanvarın 1-dək artırılıb.
Milli Məclisin 12 fevral iclasında qanunun 2022-ci il yanvarın 1-dək qüvvədə olmasını nəzərdə tutan layihə ilk oxunuşdan keçib. Başqa bir yeniliyə əsasən, müddət başa çatdıqdan sonra sahibkarların yoxlamaların dayandırıldığı dövrdəki fəaliyyəti ilə bağlı yoxlamalar (icazə verilən yoxlamalar istisna olmaqla) aparıla bilməz.
Novator.az bildirir ki, qanun vergi yoxlamaları, maliyyə bazarları sahəsində yoxlamalar, gömrük auditi, özəl tibb fəaliyyətinin subyektlərində yoxlamalar, dərman vasitələrinin keyfiyyəti, təhlükəsizliyi qaydalarına riayət edilməsi, qida məhsullarının təhlükəsizliyinə nəzarətin həyata keçirilməsi ilə bağlı yoxlamalar, yanğın nəzarəti, tikintiyə dövlət nəzarəti, təhlükə potensiallı obyektlərin və dağ-mədən sahələrinin təhlükəsiz istismarına nəzarət və radiasiya təhlükəsizliyinə nəzarət, “Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanunun tələblərinə əməl edilməsinə nəzarət, habelə insanların həyat və sağlamlığına, dövlətin təhlükəsizliyinə və iqtisadi maraqlarına mühüm təhlükə yaradan hallar üzrə yoxlamalar aparmaq imkanı verir.
