Azərbaycan nefti büdcə qiymətindən 22,30 dollar bahadır. Energetika Nazirliyinin 11 fevral məlumatına görə, “AzəriLayt”ın barreli 62,30 dollara təklif olunur.
2021-ci ilin dövlət büdcəsində bir barrel neftin qiyməti 40 dollardan götürülüb. “AzəriLayt” yanvara 50,92, fevrala 56,68 dollarla başlayıb.
Novator.az bildirir ki, beynəlxalq razılaşmaya görə, Azərbaycan 2021-ci ilin yanvar-mart aylarında gündəlik xam neft hasilatını 595 min barrel həcmində saxlamalıdır.
Hasilat razılaşmasını iri neft ixracatçıları – OPEK ölkələri (Anqola, Birləşmiş Ərəb Əmirlikləri, Ekvatorial Qvineya, Əlcəzair, İraq, İran, Konqo, Küveyt, Qabon, Liviya, Nigeriya, Səudiyyə Ərəbistanı, Venesuela) və 10 qeyri-OPEK ölkəsi (Azərbaycan, Bəhreyn, Bruney, Cənubi Sudan, Qazaxıstan, Malayziya, Meksika, Oman, Rusiya, Sudan) əldə edib.
Energetika Nazirliyi yanvar ayı üzrə gündəlik xam neft hasilatını 593 min barrel göstərib.
