Gəlir-çıxar hesabatı
Maliyyə Nazirliyi Azərbaycanın 2020-ci il büdcəsinin necə icra olunduğunu açıqlayıb. Novator.az bildirir ki, rəsmi hesabata görə, 2020-ci ildə dövlət büdcəsinin mədaxili 24 milyard 679,2 milyon manat olub, bunun 10 milyard 677,2 milyon manatı qeyri-neft sektorundan gəlib.
Dövlət Vergi Xidmətinin büdcəyə 7 milyard 387,2 milyon manat, Dövlət Gömrük Komitəsinin 3 milyard 938,2 milyon manat, Dövlət Neft Fondunun 12 milyard 200 milyon manat ödədiyi, büdcə təşkilatlarının ödənişli xidmətlərindən 596,1 milyon manat əldə olunduğu vurğulanır, dövlət əmlakının icarəyə verilməsindən gəlir 10,3 milyon manat, başqa daxilolmalar 547,4 milyon manat göstərilir.
Qeyd olunur ki, dövlət büdcəsinin xərcləri 26 milyard 416,3 milyon manat səviyyəsində rəsmiləşib, bunun 62 faizi cari xərclərə yönəldilib, 31,5 faizi əsaslı xərclərə, 6,5 faizi dövlət borcuna və öhdəliklərinə xidmətlə bağlı xərclərə sərf olunub.
2020-ci ildə dövlət büdcəsinin kəsiri 1 milyard 737,1 milyon manatdır.
