Arif Hacılıdan 18 oktyabr təklifi
Müsavat Partiyasının başqanı Arif Hacılı Dövlət Müstəqilliyi Gününün – 18 oktyabrın yenidən qeyri-iş günü elan olunmasına çağırır. Novator.az-ın məlumatına görə, siyasətçi özünün “Facebook” səhifəsində yazır ki, 2021-ci ildə dövlət müstəqilliyinin bərpasının 30 ili tamam olur: “Müsavat Partiyası bu bayramın layiqincə qeyd olunması üçün öz resursları çərçivəsində müəyyən tədbirlər təşkil edəcək. Yubileyin dövlət səviyyəsində qeyd edilməsi üçün isə rəsmi qərarlar, ilk növbədə müstəqillik aktının qəbulu gününün – 18 oktyabrın qeyri-iş günü elan olunması, ölkə miqyaslı tədbirlərin keçirilməsi vacibdir”.
Azərbaycan Respublikasının dövlət müstəqilliyinin bərpası 1991-ci ildə üç mərhələdən keçib: avqustun 30-da parlament dövlət müstəqilliyinin bərpa olunması haqqında bəyannamə, oktyabrın 18-də dövlət müstəqilliyi haqda konstitusiya aktı qəbul edib, dekabrın 29-da akt ümumxalq səsverməsi ilə təsdiqlənib.
2006-cı ildə Dövlət Müstəqilliyi Günü – 18 oktyabr qeyri-iş günü olan rəsmi bayramlar siyahısından çıxarılıb.
1988-ci ildə başlayan milli azadlıq hərəkatının öncül şəxslərindən olan Arif Hacılı 1991-1992-ci illərdə Azərbaycan Xalq Cəbhəsi Ali Məclisinə sədrlik edib.
1990-1995-ci illərdə parlamentin deputatı olub. Əbülfəz Elçibəyin prezidentliyi dövründə (1992-1993) ərazi hakimiyyət və idarəetmə orqanları ilə iş üzrə dövlət müşaviri postunu tutub.
1992-ci ildən Müsavatın katibi, 2001-ci ildən başqan müavini olub. 2003-2005 və 2011-2012-ci illərdə həbsdə yatıb. 2014 və 2019-cu illərdə Müsavat başqanı seçilib.
