Aksiya davam edir
Məhbus jurnalist Polad Aslanov aclıq aksiyasını davam etdirir. “Turan”ın 8 fevral məlumatına görə, Ombudsman Aparatının nümayəndələri Bakı İstintaq Təcridxanasında Polad Aslanova baş çəkiblər. Jurnalistin vəziyyətinin normal olduğu, onun sərbəst hərəkət etdiyi bildirilir.
Polad Aslanov adi kamerada qalır, digər məhbuslardan təcrid edilməyib, amma tibbi nəzarətdədir.
Məhbusun xanımı Gülmira Aslanova “Turan”a deyib ki, fevralın 8-də həyat yoldaşı ona zəng vurub. Polad Aslanov böyrəklərində ağrı olduğunu deyib, qeyd edib ki, apellyasiya şikayətinə ədalətli baxılması təmin olunana qədər aclıq aksiyasını dayandırmayacaq.
Novator.az bildirir ki, Xeberman.com və Press-az.com saytlarının baş redaktoru olan Polad Aslanovu 2019-cu il iyunun 12-də Dövlət Təhlükəsizliyi Xidməti həbs edib və ona dövlətə xəyanət ittihamı verilib.
Rəsmi açıqlamaya görə, Polad Aslanov xarici xüsusi xidmət orqanlarının əməkdaşları ilə ölkədən kənarda məxfi görüşlər keçirib, maddi maraq müqabilində əməkdaşlığa cəlb edilib: “O, xarici xüsusi xidmət orqanlarının əməkdaşlarından aldığı tapşırıqlar əsasında topladığı məlumatları Azərbaycanın dövlət təhlükəsizliyi və müdafiə qabiliyyəti zərərinə həmin orqanlara ötürüb, onların tapşırığı ilə mətbuatda, sosial şəbəkələrdə dövlət əleyhinə, hüquq mühafizə orqanlarının qanuni fəaliyyətini nüfuzdan salmağa yönəlmiş yazılar yayımlaması razılaşdırılıb”.
2020-ci il noyabrın 16-da Bakı Ağır Cinayətlər Məhkəməsi jurnalistə 16 il azadlıqdan məhrumetmə cəzası kəsib.
Bakı Apellyasiya Məhkəməsinə şikayət edən Polad Aslanov fevralın 1-də keçirilən ilk prosesdə qanunsuz tutulub məhkum olunduğunu, hüquqlarının pozulduğunu vurğulayaraq aclıq aksiyasına başladığını bəyan edib.
