Mənfəət və zərər
Banklar Assosiasiyasına istinad edən iqtisadçı Rövşən Ağayev yazır ki, Azərbaycanın 26 bankının 23-ü 2020-ci ili mənfəətlə başa vurub: “Sektor üzrə mənfəətin həcmi 616 milyon manat göstərilib. Bunun 555 milyon manatı 5 banka aid olub: “Kapital Bank”, “Paşa Bank”, “Xalq Bank”, Beynəlxalq Bank və “Bank of Baku”.
Novator.az-ın məlumatına görə, ekspert 2019-cu illə müqayisədə bank sektorunda mənfəətin 131 milyon manat azaldığını qeyd edir: “Mənfəətin həcmi sarıdan 2019-cu ildə ilk üçlükdə yer almış “Unibank” ötən il ilk beşlikdən kənarda qalıb, bununla belə, yenə də yüksək mənfəətli banklardan biridir.
Bank sektorunda 49 milyon manata yaxın zərər yaranıb. Həmin zərərin təxminən 40 milyon manatı “Yelo Bank”ın hesabınadır”.
2020-ci ildə “Atabank”, “Amrah Bank”, “AGBank” və “NBCBank” bankları qapadılıb.
Əmanətlərin Sığortalanması Fondunun yeni hesabatına görə, həmin bankların əmanətçilərinə qorunan əmanətlər üzrə ümumilikdə 622,5 milyon manatdan çox kompensasiya ödənib.
Banklarda əhalinin qorunan əmanətlərinin ümumi məbləği 686 milyon manatdır.
