Pensiyalar 11,4 faiz artdı
Prezident İlham Əliyev bütün növ əmək pensiyalarının sığorta hissəsinin yenilənməsinə sərəncam verib. Fevralın 5-də imzalanan sərəncamda Əmək və Əhalinin Sosial Müdafiəsi Nazirliyinə 2021-ci il üçün indeksləşdirməni həyata keçirmək tapşırılıb. Bunun üçün Dövlət Statistika Komitəsinin müəyyən etdiyi orta aylıq nominal əməkhaqqının illik artım faizi – 11,4 faiz əsas götürülür. Artım 2021-ci il yanvarın 1-dən tətbiq olunacaq.
Pensiyanın sığorta hissəsi fərdi hesabın sığorta hissəsində qeydə alınmış pensiya kapitalının gözlənən pensiya ödənişi müddətinin aylarının sayına (144 ay) nisbəti şəklində hesablanan məbləğdir.
Novator.az saytı bildirir ki, əmək pensiyasının minimum məbləği 2019-cu il oktyabrın 1-dən 200 manat müəyyən olunub, 2020-ci ilin indeksləşdirməsi nəticəsində 233,2 manata çatıb. 2021-ci ilin 11,4 faizlik indeksləşdirməsi nəticəsində minimum pensiya məbləği 26,5 manat artır.
2017-ci il iyulun 1-dək Azərbaycanda kişilər 63, qadınlar 60 yaşda pensiyaya çıxırdı. Həmin vaxtdan bəri yaş həddi artırılır. 2021-ci il iyulun 1-dək kişilərin, 2027-ci il iyulun 1-dək qadınların pensiya yaşı 65-ə çatacaq.
