Milli Məclisin üzvləri nə qədər maaş alır?
Milli Məclisin mətbuat və ictimaiyyətlə əlaqələr şöbəsi parlament üzvlərinin aylıq vəzifə maaşları haqqında rəsmi açıqlama yayıb. Qeyd olunur ki, “Milli Məclis deputatının statusu haqqında” qanuna görə, parlament sədri 2475 manat maaş alır: “Milli Məclis sədrinin birinci müavininə sədrin maaşının 90 faizi (2227,5 manat), sədrin müavininə 85 faizi (2103,75 manat), parlamentin komitə və komissiya sədrinə 80 faizi (1980 manat), komitə və komissiya sədrinin müavininə 75 faizi (1856,25 manat) miqdarında maaş verilir. Deputatın aylıq vəzifə maaşı sədrin maaşının 70 faizinə (1732,5 manat) bərabərdir”.
Məlumata əsasən, Milli Məclisin sədrinə, onun birinci müavini və müavinlərinə, Milli Məclisin komitə və komissiya sədrləri və onların müavinlərinə, deputatlara səlahiyyətləri ilə əlaqədar xərclər üçün vəzifə maaşlarının 50 faizi məbləğində vergilərdən azad olunan aylıq pul təminatı da düşür”.
Novator.az bildirir ki, Azərbaycanda sonuncu parlament seçkisi 2020-ci il fevralın 9-da keçirilib, 125 dairəni əhatə edib. Dörd dairə üzrə nəticələr ləğv olunub, parlament 121 nəfərlə fəaliyyətə başlayıb, avqustda bir deputat vəfat edib.
