Əlaqələndirmə Qərargahında müzakirə
İşğaldan azad edilmiş ərazilərə məsul Əlaqələndirmə Qərargahının iclası keçirilib. AZƏRTAC-ın 4 fevral məlumatına görə, qərargahın başçısı, Prezident Administrasiyasının rəhbəri Samir Nuriyevin sədrlik etdiyi iclasda nazirlik və dövlət təşkilatlarının vaxt qrafiki üzrə görməli olduğu işlər nəzərdən keçirilib.
Bildirilib ki, 17 istiqamət üzrə işçi qrupların fəaliyyət göstərdiyi İdarələrarası Mərkəzdə 55 qurum və 150-yə yaxın əməkdaş təmsil olunur, mərkəzin fəaliyyətinə konkret mövzu və tapşırıqların icrası məqsədilə ekspertlər də cəlb edilib.
İclasda İdarələrarası Mərkəzin, işğaldan azad edilmiş ərazilərə qayıdış, ətraf mühitin qorunması və enerji təminatı, şəhid ailələri və Vətən müharibəsi iştirakçılarının sosial təminatı, şəhərsalma, nəqliyyat-infrastruktur və digər istiqamətlərdə fəaliyyət göstərən işçi qrupların məruzələri dinlənilib, qaldırılan məsələlərlə bağlı ətraflı müzakirələr aparılıb və zəruri tapşırıqlar verilib.
Ermənistan 1988-1994-cü illərin təcavüzündə Azərbaycanın bütün cənub-qərbini işğal edib.
2020-ci il sentyabrın 27-dən Azərbaycan Ordusunun apardığı əməliyyatlarda Cəbrayıl, Füzuli, Zəngilan, Qubadlı, Şuşa şəhərləri, bu rayonların, eləcə də Xocavənd, Xocalı, Laçın rayonlarının, keçmiş Ağdərə rayonunun bir çox qəsəbə və kəndi azad olunub.
Noyabrın 10-da hərbi əməliyyatlar dayandırılıb, dekabrın 1-dək Ağdam, Kəlbəcər, Laçın rayonları Azərbaycana qaytarılıb.
Prezident İlham Əliyevin 24 noyabr 2020-ci il sərəncamı ilə yaradılmış Əlaqələndirmə Qərargahında prezidentin köməkçiləri, birinci vitse-prezidentin köməkçiləri, baş prokuror, nazirlər, dövlət komitələri və xidmətlərinin rəhbərləri təmsil olunur.
